ارسال توسط سارا تجويدي
فضو لي كيتابخاناسي و ايلك قيزلار اوركستري
يازان : تبريزلي روخسه ره ــ آنکارا
آذربايجان مدنيت سماسي نين بو ياخينلاردا الدن گئتميش اولدوزلارينين بيري بؤيوك تار اوستادي "ماحمود آقا شاطريان" واختیلا تبريزلي مدنيت خادمي "افشار" لا بيرگه همين شهرده يارانميش بؤيوك "فضولي" كتابخاناسي كؤلگه سينده ايراندا ايلك قيزلار موسيقي دسته سيني ياراتماقلا اؤز آدلاريني (ایران) آذربايجان موسيقي سينده ابدي لشدیرمیش لر. اوستادين بو نيسگيللي اؤلومونو بهانه ائدرك ، تبريزده يارانميش فضولي كيتابخاناسينين تملچی سی ( رضا افشار پور " افشار" )ین واختیلا ايران دا اولدوغوم زامان بو حاقدا بيز لره سؤيله ميش خاطره سيني حؤرمتلي اوخوجولاريما چاتديريرام:
ــ فضولي كيتابخاناسي كؤلگه سينده بول ــ بول يئنيليكلره ال آتديقدا ايلك دؤنه قيزلار موسيقي گروهونو ياراتماق فيكرينه ده دوشدوم . بو فيكري ايره لي سورمكده اليمدن توتا بيله جك كيمسه ني گزيرديم . چئشيدلي شخصيتلري ذهئنيمدن كئچيرتديكده ان باجاريقلي و يارارلي كيمسه ؛ ماحمود آقا شاطرياني دويوب ، در حال فيكريمي اونونلا اورتايا قويدوم . اوستاد فيكريمي صميمييتله قارشيلاييب و نه دن اونو سئچدييمي سوردو .
بير يؤندن سنين اؤز قيزين "لاله" و قارداشين قيزلاريني بو گروها عضو سئچميشم . باشقا بير طرفدن ايسه سنين ياشينين يوخاري اولدوغو هر هانسي بير شوبهه نين اورتايا چيخماسينا مانع اولا بيلرــ دئديم .
قيزلاري كيتابخانانين دفترينه چاغيريب و اونلارلا دانيشيق آپارماغيميزا سؤز وئرديك . گونلرين بيرينده قيزلار بير – بير فضولي كيتابخاناسي دفترينه گليب بيزله دانيشيب و عضو اولوردولار بو ايشده بير نوقطه بيزي اؤزونه چكدي اوست - اوسته قيزلارين آدلاري توركجه ايدي ظارافاتلا اوزومو اوستادا توتو ب ؛ سونرا گلن قيزين دا آدي توركجه اولسا داها اونو يازماياق ، دئديم . بو آندا بير قيز ايچه ري گيريكده آديني سوردوم . ( دورنا مارالباشام ) دئين حالدا اوستادلا من بيرليكده اوره كدن گولوشدوك . ماراقلانديريجي سي بو كي بو قيزين كيچيك آديندان باشقا سوي آدي ايسه توركجه ايدي .
بئله ايسه ايلك قيزلار موسيقي گروهويارانيب و چاليشمالاري آرديجيل ايزله نمه يه باشلادي. نئچه آي دان سونرا اوستانيميزدا كيشيلر اوچون موسيقي ده فعاليت گؤسترمك چوخ چتين كئچدييي بير دورومدا قيزلار رسمي حالدا ايلك چيخيشلاريني ايفا ائتديلر . بو چيخيش تبريزين "29 بهمن" خسته خاناسينين قادين ايشچيلري ، "بهزيستي" يه باغلي اولان "شهيد مفتح و فياض بخش" بؤلوملري و قيزيل آي پارايا (هلال احمر) باغلي اولان "شهيد قاضي" قيزلارينين رسمي چاغريشي ايله تبريز ايشچيلر باشگاهي (باشگاه كارگران تبريز) سالونوندا باش توتدو .
بو اؤلمز ايكي شخصيتين توتدوغو يوللارين ايزله ييجي لري طرفيندن گونو گوندن آرتيق رونقلي اولماسي آرزوسويلا ؛ قيزلار موسيقي گروهونون ايلك چيخيشلاري بو تئزليكده c.d شكلينده چيخاجاق موشتولوغونو وئرمكله ،يئري گلديكده واختي ايله كيهان گونده لييينده باسيلميش همين گئديشين خبريني اوخوجولاريما چاتديريرام:
آذربايجان قيزلار موسيقي گروهو ايلك دؤنه چيخيش ائتدي
كيهان گونده ليگينين تبريزده كي خبر يازاني :
آذربايجان قيزلار موسيقي گروهو تبريزده معلول و اومودسوز قيزلار اوچون ايلك هنري چيخيشلاري ايله رسمي حالدا فعاليته باشلاديلار . فضولي كيتابخاناسينا باغلي اولان بوگروها 22 صنعتكار قيز توپلانيب كي ايلك چيخيشلاريندا شرقي آذربايجان بهزيستي سازمانينا باغلي شهيد مفتح آدلي گئجه ـ گوندوز ساخلانيلان اومودسوز قيز ، ذهني خسته ليكلري اولان قيزلارا يارديم ائدن فياض بخش آدلي توپلومون خسته لري ، آي پارايا باغلي اولان شهيد قاضي طباطبايي آدينا يييه سيز اوشاقلار بئجرمه مركزي نين قيزلارينا و تبريز 29 بهمن خسته خاناسينين خانيم ايشچيلري اوچون آذري موسيقيسي اجرا ائتديلر .
بو شنليك تؤره نينده ، ملا محمد فضولي كيتابخاناسينين تمل قوياني و اوستانين ايشچيلر ايدمان ـ مدنيت توپلوسونون ( باشگاه فرهنگي ورزشي كارگران ) هنري ـ فرهنگي ايشلرينين مسئولو اولان « رضا افشار» اؤز چيخيشيندا ، 1371 جي گونش ايلي ملا محمد فضولي آدينا قورولان كيتابخانادان سؤز آچاراق دئدي : اوستان دا ان بؤيوك هنري گروهو 1372 جي گونش ايلينين ياز فصلينده 300 تعهد لو هنرمنددن توپلاناراق شكل تاپيب . او دئدي : ملا محمد فضولي كيتابخاناسينا باغلي اولان بوهنري گروهون صنعتكارلاري كؤنوللو اولاراق چاليشيب و اؤز هنري چيخيشلارينين اوجرتي يئرينه كيتاب آليب و كيتابخانايا پاي وئريرلر .
او آرتيردي : بوگروه اوستان مسئوللارينين مادي و معنوي يارديملاري اولمادان ؛ كوتله روحلارين گوجلنديرمك اوچون بوللو ديره نمكله چاليشيرلار .بوتؤره نين آرديندا نومايش ، ياريش و كيچيك اوشاقلارموسيقي گروهو ؛ آذربايجان كؤكلو موسيقي اجرا ائده رك هامينين ماراغين قازانديلار .
آذربايجان قيزلار موسيقي اركسترين ايلك قورولوشون صنعتكارلاري بئله اولموشدو :تاردا : لادن روحي لاله ، نيكو صيرفي ، آي گون منصوريان ، صونا حريري ، آي تك مطمئن و سئودا هادي . كمانچادا : دورنا مارال باش ، لاله شاطريان ، رفعت زاهدي فر و سولماز شاطريان قارماندا : ايلقار منصوريان ، سولماز ايراني ، ائلناز سعادت بخش . ناغارادا : ائلناز عليون ، سارا صادقي و شهرزاد قصاب پور . قوشا ناغارا دا : بهاره شاطريان آكاردئون دا : گلناز گلشن خليلي كور اوخويانلار : ائلناز ايراني ، اولدوز اشك ريز حق ، ترلان سلطاني كلهر و لاچين هادي . "فضولي كيتابخاناسي"نا باغلي اولموش "ايلك قيزلار موسيقي گروهو"نون شكيللري:
ايكينجي شکیل حاقدا ایضاح:
1 –شكيلين اورتاسيندا اوتورموش رحمتليك ” آشيق علي فيض الهي وحيد ” (دوكتور حسين فيض الهي نين آتاسي) همين گروهون عضوو دئييل بلكه او فضولي كتابخاناسينا باغلي اولموش “ساري تئل” آدلي ايلك رسمي آشيق دسته سينين ان ياشلي آشيقي دير. (آللاه دئين اولسا ياخين گله جكده سارِي تئل حققينده ده اوخوجولاريما يازاجاغام)
2 – رحمتلي اوستاد شاطريانين يگانه قيزي رحمتلي “لاله شاطريان” دا هر ايكي شكيل ده گؤرونور. لاله همين گروه دا كمانچه چالاردي.
3 – بير گون فضولي گروهونون عكاسي ساييلان ” فاطمه بهادري” قيزلاردان شكيل چكمك نيّتي ايله “باشگاه كارگران”ا گلدي. همين زامان آشيق علي ده نه ايشي وارديسا كتابخانا و و اورايا باغلي اولموش بوتون گروهلارين باشچيسي ساييلان “رضا افشار”ي گؤرمك قصديله اورايا گلدي.
آشيق علي ، رضا افشارين تكليفي ايله يادگاري شكيل چكمك ايچون قيزلارين اورتاسينا گيريب و بير نئچه شكيل چكديريلدي.
* رضا افشارپور (افشار) ، پارس آباد شهرينده بير مدنيت سارايي تيكمك فيكرينده دير. قسمت اولسا او شهرين غيرتلي مدنيت چيلري يارديمي ايله ياخين گله جك ده بو نجيب و مقدس ائوين آچيليشي نين تانيقي اولاريق.